Майрамдан кийин Оштун аянтын тазалоого 35 жумушчу тартылып, аларга активисттер кол кабыш кылышты

Жаңы жылдык кечеден кийин Ош шаарынын борбордук аянтын тазалоого 35 жумушчу тартылып, аларга активисттер, мекемелердин кызматкерлери да көмөктөштү. Бул тууралуу Ош шаардык мэриясынан билдиришти.

"Жаңы жыл кечесинен кийин Ош шаарынын борбордук аянтынан 40 куб таштанды чыгарылды. Шаарды тазалоону "Ош-Тазалык" ишканасынын жумушчулары таң эрте саат 4:30да баштады. Борбордук аянтты тазалоого 35 жумушчу, 2 техника тартылды. Бүгүн дем алыш экендигине карабай ишкана жумушчулары штаттык режимде иштеп жатышат. Шаар көчөлөрү, көп кабаттуу үйлөрдүн айланасы да тазаланууда. Бүгүн таштанды контейнерлерине топтолгон таштандылардын көлөмү күндөгүдөн 200-300 кубга көп. Толгон таштанды контейнерлери да таңдан тартып алына баштады. Ал эми борбордук аянтты таштандылардан арылтууда мекеме жумушчуларына Ош шаарындагы активдүү жаштар көмөктөшүп, кол кабыш кылышты", - деп билдирди мэриянын коомчулук менен байланыш кызматынын башчысы Талантбек Канатбек уулу.