Америкада бетине 4 килограмм 500 грамм эт өсүп кеткен өспүрүмгө операция жасалат (нерви жукаларга сунушталбайт)

"Кубалык 14 жаштагы Эмануэль Зайастын өмүрү коркунучта турат. Анын мурдуна өсүп чыккан шишиктин салмагы бүгүнкү күндө 4 килограмм 500 граммды түзөт", - деп жазылат чет элдик маалымат булактарында.

Анда белгиленгендей, Эмануэль азыркы тапта тамактануудан абдан кыйналат, өтө арыктап кеткен. Мындан тышкары шишик анын дем алуусуна, көрүүсүнө жолтоо болот. Салмагы оор болгондуктан өспүрүмдүн моюну аны көтөрө албай сынып кетиши мүмкүн.

Эмануэль тубаса сөөк оорусу менен жабыркагандыктан буту-колунун сөөктөрү ийилип кеткен. Өз алдынча баса албайт.

Ал 12 жашка толгондо мурдунун үстүндө жара сыяктуу нерсе пайда болгон. Ата-энеси уулу жетилүү куракта болгондуктан аны безетки деп ойлоп маани беришкен эмес. Бирок ал шишик өтө тездик менен өсүп, Кубадан аны алып сала турган дарыгер табылган эмес.

Өткөн айда гана АКШдан өспүрүмдүн шишигин ала турган хирург табылган. Алдын ала айтылган маалыматтар боюнча, операция 8 сааттан 14 саатка чейин созулат. Шишик алынгандан кийин өспүрүмдүн тиштерин жана жаагын калыбына келтирүү үчүн дагы 2 операция жасалат.