Жогорку Кеңештин депутаты Жыргалбек Калмаматов 45 жашында каза болду

Жогорку Кеңештин "Кыргызстан" фракциясынан депутат Жыргалбек Калмаматов каза болду. Бул тууралуу бүгүн, 2-январда SUPER.KG порталына аталган фракциянын лидери Алмазбек Баатырбеков билдирди.

Анын айтымында, кечээ, 1-январда кечинде Калмаматов инфаркттан улам каза болгон. "Жыргалбек Калмаматовду акыркы сапарга узатуу зыйнаты Алай районунун Гүлчө айылында эртең, 3-январда саат 12:00дө өтөт", - деди Баатырбеков.

Жыргалбек Калмаматов 1972-жылдын 22-декабрында Ош облусунун Алай районундагы Гүлчө айылында туулган. Ал 1993-жылы Финансы-экономикалык техникумунун салык инспектору адистигин бүтүргөн.

Эмгек жолун 1993-жылы бизнес чөйрөсүндө жеке ишкерликтен баштап, аны 2002-жылга чейин уланткан.

- 2002-2004-жылдары "Темир" мамлекеттик ишканасынын директору;

- 2004-2010-жылдары "Коңурат" ассоциациясынын башкы директору;

- 2010-2015-жылдары "Агромет" жоопкерчилиги чектелген ишканасында башкы директору;

- 2015-жылы "Кыргызстан" саясий партиясынын тизмеси боюнча Жогорку Кеңештин VI чакырылышынын депутаты болуп шайланган.

Үй-бүлөлүү, тогуз баланын атасы.

SUPER.KG порталынын эмгек жамааты Жыргалбек Калмаматовдун дүйнөдөн кайтканына байланыштуу үй-бүлөсүнүн, жакындарынын аза кайгысын тең бөлүшүп, терең кайгыруу менен көңүл айтат.