Кыргыздын 2 балбаны катышкан мелдеш 2017-жылдагы дүйнөнүн мыкты беттеши деп саналды

Грек-рим күрөшү боюнча Кыргыздын 2 балбаны катышкан мелдеш 2017-жылдагы дүйнөнүн мыкты беттеши деп саналды. Бул тууралуу бириккен дүйнөлүк күрөштүн маалымат кызматы билдирет.

Анда, Кыргыз балбаны Акжол Махмудов менен АКШлык Камал Амир Баинин жаштар арасындагы Дүйнө чемпиондугундагы беттеши дүйнө рейтингинде 2-орунду ээледи.

Эске салсак, Акжол Махмудов 74 килограммга чейинки салмак ченинде күч сынашып, жарым финалдык беттеште жаракат алганы менен, финалдык беттешке чыккан. Ал америкалык балбанга туш келип бир нече ыкманы колдонуп, атаандашын кулатууга аракет кылган. Беттештин жыйынтыгында Амир Баи 16 упай топтоп Акжол Махмудовдун үстүнөн жеңишке жеткен. Амир Баи алтын медалын тагынса, Акжол Махмудов күмүш медалга ээ болгон.

Акжол Махмудов менен Камал Амир Баинин беттеши

Тайбэйде өткөн жаштар арасындагы Азия чемпиондугунда Кыргыз балбаны Тынар Шаршенбеков менен түркмөнстандык Сейдилла Тазаевдин таймашы Дүйнөнүн мыкты беттеши болуп, рейтингде 1-орунга татыды.

Финалга чыгуу үчүн беттеште эки балбан мыкты ыкмаларды колдонуп, бири-бирин көтөрүп чаап, упайларды топтошкон. Беттештин жыйынтыгында Кыргыз балбаны 10 упай топтосо, Түркмөнстан балбаны 17 упай топтоп финалга өтүп кеткен. Ал эми Тынар Шаршенбеков коло медаль үчүн күрөшүүгө мүмкүнчүлүк алып, 3-орунду ээледи.

Тынар Шаршенбеков менен Сейдилла Тазаевдин беттеши

2017-жылдын грек-рим күрөшү боюнча Дүйнөнүн мыкты 3 беттеши