Окуучулар эсин жоготуп жыгылып жаткан Кочкордогу Туз айылдык мектебинин курулуш каражаттары текшерүүгө алынды

"Нарын облусуна караштуу Кочкор районунун Туз айылдык мектебинде окуучулардын баш оорусу көбөйүп, айрымдары эсин жоготуп жыгылып жаткан. Алар массалык түрдө эмес, бирок ошондой учурлар катталып турган", - деп билдирди бүгүн, 4-январда Кочкор райондук билим берүү бөлүмүнүн башчысы Улан Өзүбеков SUPER.KG порталына.

Өзүбековдун маалыматына ылайык, Жунушаалы кызы Сайнап атындагы Туз орто мектебинин мугалимдеринин жазган арызынын негизинде райондук билим берүү бөлүмү жеринен мектепти көрүп кайткан.

"Бул мектеп 2005-2006-жылдары Корея тарабынан жардам иретинде курулуп берилген. Имаратты бат салып бүтүрүүчү атайын курулуш каражаттары пайдаланылган. Полу жылытылуучу пол болгондуктан, кышкысын от жакканда полдон башты оорутуучу жыт чыгышы мүмкүн деп жазышкан мугалимдер арызында. Биз экотехинспекциянын өкүлдөрү менен биргеликте барып имаратка керектелген курулуш каражаттарынан текшерүү үчүн алдык. Нарында тиешелүү лаборатория жок болгондуктан Бишкекке жөнөтүлдү. Азырынча жыйынтык чыга элек", - дейт Өзүбеков.

Ал белгилегендей, мектеп 250 балага ылайыкталып курулган. Балдардын баш оорусу, кээде эсин жоготуп калганы акыркы 2-3 жылда билине баштаган. Бирок эч ким бул абалга имараттагы курулуш каражаттары таасирин тийгизиши мүмкүн деп ойлогон эмес.