Бишкекте азык-түлүк саткан дүкөн тонолду. 4 саат мурда чакырылган милиция келе элек

Бишкектеги Абай көчөсүндө жайгашкан азык-түлүк дүкөнү тонолду. Бул тууралуу дүкөндүн ээси Гүлкайыр Бабаева SUPER.KG порталына билдирди.

"Мен 4-январь күнү саат 22:00 чамасында дүкөндү жаап үйүмө кеткем. Эртең менен саат 8де келип товарлардын уурдалганына күбө болдум. Тамеки, кофе, шоколад жана башка азык-түлүктөрдү кошуп жалпысынан 50 миң сомдон ашык товар жок. Өткөн жылдын ноябрь айында да уурулар тоноого аракет кылып, ичине кире албай коюшуптур. Милиция чакырсак 4 сааттан бери келбей жатат. Айланада башка имараттардын видеокөзөмөлдөрү бар. Бирок алар милициянын уруксаты менен гана көрсөтүшөт экен. Биз тартип сакчыларына коопсуздугубузду коргойт деп ишенсек, алардын кылган жоругу ушундай. Бул дүкөндү үй-бүлөм менен 1 жылдан бери ижарага алып иштетебиз. Эми уурулар табылабы билбейм", - дейт Бабаева.