Грузиянын соту Михаил Саакашвилини 3 жылга эркинен ажыратты

Грузиянын мурдагы президенти Михаил Саакашвили "кызмат абалынан пайдаланган" деп айыпталып, сыртынан 3 жылга кесилди. Бул тууралуу чет элдик басылмалар жазып чыгышты.

"Мындай чечимди бүгүн, 5-январда Тбилиси шаарынын соту чыгарды. Михаил Саакашвили 2006-жылы банк кызматкерин өлтүрүп соттолгон 4 полиция кызматкерин мөөнөтүнөн мурда актагандыгы үчүн соттолду", - деп айтылат маалыматта.

Андан тышкары, Саакашвили Грузияда башка кылмыш иштери боюнча айыпталууда жана Грузияга экстрадицияланышы мүмкүн. Михаил Саакашвили Грузиянын жарандыгынан ажыратылып, учурда Украинада болууда. Ал ошондой эле Украинанын жарандыгынан да ажыратылган, бирок бийликтин бул чечимин тааныбай келет.