Кытайлык миллионер 3 жылдан бери көчө шыпырып, таштандыларды терип айлананы тазалайт

Кытайлык миллионер 3 жылдан бери таң эрте көчө шыпырып айлананы тазалап келет. Бул тууралуу чет элдик маалымат каражаттары жазып чыгышты.

Маалыматта жазылгандай, Кытайдын Чунцин шаарында 51 жаштагы жергиликтүү миллионер Чжун Цунжун 3 жылдан бери таң эрте көчө шыпырып, таштандыларды терип айлананы тазалайт. Цунжун автоунааларды жана кыймылсыз мүлктөрдү сатуу менен алектенет.

Анын айтымында, айлана-чөйрөнү коргоо жана аны таза кармоо адамдын социалдык статусунан көз каранды эмес. Ал өзүнүн мисалы менен адамдарды тазалыкты сактоого үндөгүсү келет.

Ошондой эле ал бул үлгүнү Цинхуа университетинин профессорунан 2015-жылы Хайнань аралында эс алып жатканда алганын маалымдаган.

"Мен жолуктурган профессор төрт жылдан бери деңиз жээгиндеги таштандыларды тазалап келет экен. Бул окуяны көргөн соң мен дагы тазалыкты сактоого өз салымымды кошуп башкаларга үлгү болгум келди", - деп билдирген миллионер.

Мындан сырткары, Чжун Цунжун башында өз короосунан баштап кийин жакын жайгашкан аймактарды да тазалап баштаганын жана өз кызматкерлерине да табиятты коргоп, айлана-чөйрөнү таза кармоо зарыл экенин дайыма эскертерин кошумчалаган.