Англиялык сүрөтчү жоголуу коркунучунда турган жаныбарлардын сүрөттөрүн жарыялады

Англиялык сүрөтчү Тим Флах жоголуу алдында турган жаныбарлардын сүрөттөрүн жарыялады. Сүрөтчү эмгектерин өзүнүн Твиттердеги баракчасына чыгарган. Маалым болгондой, бул сүрөттөрдү тартуу үчүн ага 2 жыл керектелген. Сүрөттөргө сайгак, илбирс, бегемот, филиппиндик бүркүт жана башка жаныбарлар түшүрүлгөн.

Евразиянын талааларында байыр алган сайгак Кызыл китепке жоголуу алдында турган жаныбар катары киргизилген.

Илбирс да жоголуу алдында тургандардын катарына кирет. Алар тоо кыркаларында жашашат. 2008-жылдан тартып жаратылышты коргоочулар күн сайын дүйнө жүзүндө орто эсеп менен 4 илбирс өлө турганын аныкташкан. Азыркы тапта жапайы жаратылышта 4 миңден 7 миңге чейин илбирс бар экени белгилүү.

Китбаштуу деп аталган чоң илек-илекке окшогон канаттуу Чыгыш Африкада көп кездешет. Канаттуу көп убактысын саздак жерлерде балык кармоо менен өткөрөт. Ал да Кызыл китепке киргизилген.

Жөнөкөй бегемот да жоголуу коркунучунда турган жаныбарлардын катарын толуктайт. Бегемоттун тиштери өтө баалуу деп саналгандыктан, бул жаныбарды өлтүрүп, сөөктөрүн сатып бизнес кылган адамдардын саны дүйнө жүзүндө миңдеп саналат.

Филиппиндик бүркүттүн канаттарынын узундугу 2 метрге чейин жетет. Ал Филиппин аралдарында гана кездешип, улуттук символ катары эсептелет.