Президентти, депутаттарды жана премьер-министр баштаган аткаминерлерди калпак кийүүгө милдеттендирген мыйзам сунушталды

Жогорку Кеңештин депутаты Экмат Байпакбаев ("Республика-Ата-Журт") кыргыз калпагын мамлекеттик символдордун катарына киргизүү боюнча мыйзам сунуштап жатат. Депутаттын демилгеси бүгүн, 8-январда коомдук талкууга коюлду.

“Улуттук баш кийим Ак калпакка маданий символдун статусун берүү жөнүндө” мыйзам долбоору кыргыз элин руханий жактан өнүктүрүү жана муундан-муунга өтүп келген көп кылымдык салттарын сактоо максатында иштелип чыккан.

Мыйзам долбооруна ылайык, президент, төрага, премьер-министр чет өлкөлөрдө болгон расмий кабыл алуулар, иш сапарлар учурунда калпакты кийип жүрүүгө милдеттүү болот.

"Бардык деңгээлдеги чет өлкөлөрдө болгон расмий кабыл алуулар, иш сапарлар учурунда Кыргыз Республикасынын президенти, Жогорку Кеңештин төрагасы, анын орун басарлары жана депутаттар, премьер-министр, өкмөт мүчөлөрү, расмий делегациянын мүчөлөрү кыргыз элинин салттарын жана маданий дөөлөтүн кеңири даңазалоо жана сактоо максатында ак калпакты кийип жүрүүгө милдеттүү", - деп белгиленген.

Мындан тышкары Кыргыз Республикасында, ошондой эле чет өлкөлөрдө өткөрүлгөн спорттук мелдештерде, маданий иш-чараларда, фестивалдарда, конференцияларда, семинарларда, көрсөтмөлөрдө Кыргыз өлкөсүнөн барган катышуучуларга аталган иш-чаралардын расмий бөлүгүндө ак калпакты кийүү сунуш кылынат.