Парламент комитетинде мектептердеги окуу жумалыгын 5 күндүк ченемге өткөрүүгө багытталган мыйзам долбоору жактырылды

Бүгүн, 8-январда парламенттин тийиштүү комитетинде мектептердеги окуу жумалыгын 5 күндүк ченемге өткөрүүгө багытталган мыйзам долбоору үчүнчү окууда жактырылды.

Мыйзам долбооруна ылайык, окутуунун 5 күндүк ченеми ишке кирсе, ал менчик мектептерге дагы тиешелүү болот.

"Мектептерде 6 күндүк окутуу мугалимдерге жана окуучуларга ашыкча түйшүктөрдү жаратат. Окуучулар үчүн ар кандай спорттук секцияларга, ойдогудай эс алуу үчүн убакыт калбай калат. Окуучу жумасына 6 күн бою билим алуу менен, дем алыш күнү үй тапшырмаларын аткаруу менен алектенет. Ошондой эле мугалимдер да дем алыш күндөрү берилген башка тапшырмаларды текшерүүгө муктаж болушат. Андыктан мугалимдерде эс алуу үчүн бир да күн болбойт", - деп жазылат мыйзам долбоордо.

Бул мыйзам долбоордун демилгечиси КСДП фракциясынан депутат Дастан Бекешев.