2018-жылы популярдуу болчу технологиялык тренддер: Фейк жаңылыктар, "акылдуу үйлөр", 5G ылдамдыктагы интернет

Өткөн жылы популярдуулукка ээ болгон технологиялык тренддердин тизмесин түзгөн эксперттер менен аналитиктер кирип келген 2018-жылы кайсы технологиялык тренддер элдин көңүл чордонунда болорун аныктап көрүштү.

Биринчи орунду биткоин жана криптовалюталар ээлеген. Аналитиктердин көз карашы боюнча, 2018-жылы көптөгөн өлкөлөр криптовалютаны мыйзамдаштырып, аны колдонууга уруксат бере башташат. Мындан улам бул жаңы валютанын наркы көп эсе жогорулайт.

Экинчи орунду жасалма интеллект ээлеген. Жасалма интеллект бат өнүгүп, жогорку технологиялардын күйөрмандарын күн сайын жаңы ойлоп табуулар менен сүйүнтүп жаткан учуру.

Баарын таң калтырганы - бул фейк жаңылыктарынын тизмеде үчүнчү орунду ээлеши болгон. Азыркы тапта интернет колдонуучулары жакшы билгендей эле, фейк жаңылыктар күндөн күнгө көбөйүп, популярдуу болуп жаткан убагы. Эксперттердин баамында жакынкы убакта адамдар чыныгы жаңылыкты, фейк жаңылыктан айырмалай албай калышат.

Ал эми 4-орунда "акылдуу үйлөр" жайгашкан. Чет элдик маалымат булактарындагы кабарларга ылайык, "акылдуу үйлөрдө" сиздин дем алууңуз, жүрөгүңүздүн согушунан бери көзөмөлгө алып турган матрастардан тартып сизге кандай кийим жараша турганынан бери көрсөтүп бере турган күзгүлөр болот. Үйдүн атайын борбордук технологиялык системи болот. Ал үйдөн канча электр энергиясы короп жатат, бөлмөлөрдөгү температура, жашоочулардын күн тартиби, үйдүн коопсуздугу өңдүү бир катар нерселерди байкап тура алат.

Кирип келген жылы бүткүл дүйнөгө тарай турчу 5G интернети эң көп күтүлүп жаткан технологиялык жаңылыктардын бири деп эсептелип, бул тизмени жыйынтыктаган.