Алтынбек Сулайманов: "Коңшулар 40 миң орундуу стадиондорду куруп салышты, биз беш миң орундуу спорттук арена кура албай жатабыз"

"Биз спорттук арена боюнча аябай артта калдык. Коңшу Казакстан, Өзбекстан 40 миң орундуу стадиондорду 350 миллион еврого куруп салышты. Биз 5 миң же 10 миң орундуу арена кура албай келебиз", - деп бүгүн, 10-январдагы Жогорку Кеңештин жалпы жыйынында депутат Алтынбек Сулайманов нааразычылыгын билдирди.

Депутат жакында өтө турган Азия оюндары үчүн өкмөт ылайыктуу орун таба албай жатканын айтты.

"Кудайга шүгүр, спорт залдарыбыз жетиштүү. Аймактарда ишкерлерибиз спорт залдарды куруп жатышат. Бизде ошолордун башын бириктирген арена жок. Жакында Азия оюндары болот деп жатышат, аны каякта өткөрүүнү билишпей, азыр Спорт сарайын оңдоп-түзөөдөн өткөрүшүүдө. Спорт сарайына эки миң адам араң батат. Кантип Азия оюндарын, Дүйнө чемпиондугун өткөрөбүз?

Насыяларды алып жолдорду оңдодук, ипподромду салдык. Ипподром бир жылда бир иштейт. Курулушу керек, бул жөнүндө сөз жок. Борбор шаарыбызга бир чоң спорттук арена кура албай жатабыз. Биз Финансы министрлиги менен Спорт агенттигинин директорун тепкилейбиз. Булар спортчулардын курсагын тойгуза албай жүрөт. Ушуну көзөмөлгө алып, өкмөт башчынын алдына ушул маселени коюш керек", - деди Сулайманов.