Депутат: "Паспортту каттоого коюуда, жарандык алууда коррупция күч"

"Паспортту каттоого коюуда, жарандык алууда коррупция күч", - деп бүгүн, 11-январдагы Жогорку Кеңештин жалпы жыйынында депутат Надирбек Каримов билдирди. Эл өкүлү өкмөткө кайрылып, бул багытта натыйжалуу иш-чараларды көрүүгө чакырды.

"Бүгүн мамлекеттик каттоо кызматында болуп жаткан маселелер. Паспорттук столдо, элди тейлөө борборлорунда болуп жаткан маселени көтөргүм келди. Тейлөө борборлору ачылгандан кийин коррупциялык схемалар токтойт деген элдин үмүтү бар болчу. Бирок паспортту каттоого коюу маселесинде да, видеокөзөмөл турса деле адамдардын маселесин жасалма жол менен чечип, акча бермейин ишин бүтүрбөй жатат", - деди Каримов.

"Жарандык алуу маселесинде да элдин мыйзамды билбегендигин пайдаланып, ар түрдүү шылтоолор, ойлоп табылган схемалар боюнча коррупция күч алып жатат. Бул бардык аймактарда болууда. Мамлекеттик кызматкерлер, укук коргоо органдарынын баары билет, бирок буга каршы эч ким аракет кылбай жатат. Мен өкмөткө тапшырма катары айткым келет, бул боюнча жыйынтык чыгарышыбыз керек", - деп кошумчалады депутат.