Укмуш! Дүйнөлүк картаны жатка билген 2 жаштагы Умар өлкөлөрдүн желектерин да ажыратат

2 жаштагы наристе Умар Абдыкадыров дүйнөнүн картасын жатка билет. Ал 1 жашынан баштап эле мамлеккеттердин аттарын эсине сактап баштаган. SUPER.KG порталы Умардын эжеси Кундуз Талканчиевадан наристенин бул өнөрү тууралуу маалымат алды.

Анын айтымында, жаңыдан бал тили чыга баштаган бөбөк учурда өлкөлөрдүн аттарын жана жайгашкан жерин так ажыратат. Ал тургай алардын желектерин да билет. Умардын өнөрүнө капыстан күбө болгон эжеси Кундуз Талканчиева видеого тартып, социалдык тармакка жүктөгөн.

"Мен 7-январь күнү атамдын туулган күнүнө барып, Умардын картадагы өлкөлөрдү туура, так көрсөтүп жатканын көрдүм. Таң калып видеого тартып алгам. Эртеси күнү социалдык тармактарга жүктөсөм, бир күндүн ичинде 15 миңден ашык колдонуучу көрүптүр. Умар менин инимдин баласы. Алар Ош облусунун Кара-Суу районуна караштуу Баш-Булак айыл өкмөтүндө турушат. Умар болгону 2 жаш 3 айлык. Бала бакчага барбайт. Агалары ары-бери өтүп, картаны көрсөтүп көп эрмектей беришчү экен. Баланын эс тутуму жакшы окшойт, бардык өлкөлөрдү жаттап алыптыр. Видеону көргөндөр баланын талантына суктанышып, Максим Галкиндин "Лучше всех" теледолбооруна катышпайбы деп сунуштап жатышат. Чынында биз деле ага анча кызыккан жокпуз. Балким, 4-5 жашка чыкканда барып катышып келет", - дейт Талканчиева.