Шашылыш билдирүү! 12-январдан 16-январга чейин өлкө аймагында кар калың жаап, абанын температурасы кескин төмөндөйт

12-январдан 16-январга чейин туруксуз аба ырайы сакталып турат. Бул тууралуу ӨКМнын басма сөз кызматы эскертет.

12-январда жана 14-16-январларда көпчүлүк аймактарда кар жаайт. Айрым райондордо кар калың түшүшү күтүлөт. Унаа жолдору тайгак жана тоңголок болуп, тоолуу аймактарда кар күрткүлөрү жаралат. Батыштан соккон шамалдын ылдамдыгы айрым жерлерде секундасына 17-22 метрге чейин жетиши мүмкүн.

Абанын температурасы төмөндөп, Чүй, Талас өрөөндөрүндө жана Ысык-Көл ойдуңунда түнкүсүн -7…-12°, күндүз -2…-7° градуска чейин суук болот. Ош, Жалал-Абад, Баткен облустарынын өрөөндөрүндө түнкүсүн -3…-8° суук, күндүз -3° сууктан…+2° градуска чейин жылып, тоо этектеринде түнкүсүн -9…-14°, күндүз -2…-7° градуска чейин суук болот. Ал эми Нарын облусунун дыйканчылык аймактарында жана тоолуу райондорунда түнкүсүн -18…-23°, күндүз -5…-10° градус, бийик тоолуу райондордо түнкүсүн -30…-35°, күндүзү -10…-15° градуска чейин суук болушу күтүлөт.

Мындай туруксуз аба ырайы жайыттарда малды кармоону, автоунаа, энергетика жана коммуналдык кызматтардын ишин кыйындатат.