Жумагулов: "Шекер айылында 20 гектар жерге "Чыңгыз Ордосу" курулат"

Чыңгыз Айтматовдун 90 жылдыгына карата Шекер айылында 20 гектар жерге ордо курулат. Бул тууралуу бүгүн, 12-январда маданият, маалымат жана туризм министри Султан Жумагулов билдирди.

“Шекер айылынын четинде 20 гектар жерде “Чыңгыз Ордонун” курулушу башталып жатат. Быйыл мамлекеттик бюджеттен каражат бөлүндү. Бул жаңылыкты өкмөт башчы Сапар Исаков бүгүн жарыялайт. Бул өтө чоң долбоор. Айтматовдун эстелигин түбөлүккө калтыруу гана эмес, туристтик дагы өзүнчө жай болуп калат. Андан сырткары Шекер айылында Айтматовдун жана анын чыгармаларын кыргызчалаган Ашым Жакупбековдун музейлерин оңдоп-түзөө, жаңыртууга жардам берилет. Шекер айылы Айтматовду, Кыргыз өлкөсүнүн туристтик руханий жөндөмдүүлүгүн даңазалоонун ордосу болуп калмакчы”, - деди Жумагулов.

Бүгүн, 12-январда Талас облусунун Шекер айылында улуу жазуучу Айтматовдун 90 жылдыгына карата иш-чара өтүүдө.