Белгилүү окумуштуу бир нече жылдардан соң жер жүзүндө адам чыдагыс ысык аба ырайы өкүм сүрө турганын айтты

Бир канча жылдардан кийин жер жүзүндө адам чыдагыс ысык аба ырайы өкүм сүрөт. Мындай оюн белгилүү окумуштуу Стивен Хокинг билдирген.

Анын айтымында, бир канча жылдар өткөн соң Жер планетасындагы абанын температурасы жогорулап, адамдар жер жүзүндө жашай албай калышат. Маселенин баары акыркы жылдары жакшы байкалып жаткан глобалдуу жылуулуктун күчөп бара жатканында.

"Жакынкы мезгилде жер жүзү Венера планетасындай болуп калат. Башкача айтканда, биздин планетадагы жашоо адам чыдагыс ысык аба ырайынан улам токтойт", - деп билдирген окумуштуу.

Окумуштуулардын изилдөөлөрүнө таянсак, Венера планетасында кайсы бир мезгилдерде Жер планетасындагыдай жашоо-шарттары болгон. Бирок планетадагы абанын температурасы 400 градус ысыкка чейин көтөрүлүп, климат алмашкан. Мындай кырдаал эмне себептен жаралгандыгын окумуштуулар так аныктай элек.

"Дал ушундай тагдыр Жер планетасын да күтүп турат. Ошол себептен адамзаты азыртан баштап "жаңы үй" издөөсү керек", - дейт Хокинг.