Депутат: “ЕАЭБ аймагына киргизүүгө тыюу салынган Кытайдын өрдөктөрүнүн эти биздин базарларда сатылып жатат”

“ЕАЭБ аймагына киргизүүгө тыюу салынган Кытайдын өрдөктөрүнүн эти биздин базарларда сатылып жатат”, - деп бүгүн, 15-январда Жогорку Кеңештин комитетинин жыйынында КСДП фракциясынан депутат Мурадыл Мадеминов билдирди.

Ал бул боюнча көзөмөлгө алынбай жатканына нааразы болду.

“ЕАЭБ өлкөлөрүндө Кытайдан өрдөк этин киргизүүгө тыюу салынган. Биздин өлкөнүн базарларында дагы деле сатылып жатат. Кайсы мекеме көзөмөлгө алышы керек? Санитардык-эпидемиологиялык көзөмөлдөө департаменти, Ветеринардык жана фитосанитардык мамлекеттик инспекциясы, Мамлекеттик чек ара кызматы бул боюнча көзөмөлгө алуусу зарыл”, - деди ал.

Саламаттыкты сактоо министрлигине караштуу Оорулардын алын алуу жана экспертиза департаментинин директору Төлө Исаковдун айтымында, жаӊыдан иштелип чыккан мыйзам долбоорунда тамак-аш жана азык-түлүк коопсуздугу боюнча маселелер топтоштурулган.

Жыйынтыгында тамак-аш коопсуздугун камсыз кылуу жөнүндө мыйзам долбоору артка кайтарылды.