Бүгүн Бишкекте "Ала-Тоо" аянтындагы башкы балатыны жыйноо иштери башталды

Бүгүн, 15-январда борбордун "Ала-Тоо" аянтында орнотулган башкы балатыны жыйноо иштери башталды. Бул тууралуу SUPER.KG порталына мэриянын басма сөз кызматчысы Калперизат Айдарбекова билдирди.

Белгилей кетсек, башкы балатынын чырактарын жандыруу салтанаты мындан 1 ай мурун, тактап айтканда, 15-декабрда болуп өткөн. Балатыны кооздоо үчүн 1 миллион 200 миң сом сарпталса, борбордук аянттагы жаңы жылдык композицияларды орнотуп, жасалгалоого 2 миллион 800 миң сом коротулган. Ага 7 балаты, үй түрүндөгү 2 жаңы жылдык конструкция, жарык берүүчү 12 торшер, "2018" деп жазылган белги жана жарыктары жанган майрамдык кооз оргума коюлган. Мындан тышкары 19 декоративдик көлөмдүү инсталляция, бак-дарак түрүндө жасалгаланган композиция жана жарыктандырылган 10 шар коюлган.