Өзбекстанда кызматтан алынган ректор, министрлер акыркы үч жылда алган айлыгын кайрадан мамлекетке төлөп берет

Өзбекстанда кызматтан бошотулган ректор, министрлер үч жылдык мамлекеттен алган айлыгын өлкөгө кайра төлөп берет. Бул тууралуу Өзбекстандын маалымат булактары жазышты.

Маалыматка ылайык, 11-январда президент Шавкат Мирзийоевдин жетекчилиги алдында видеоселектордук кеңешме өткөн. Бул кеңешме Өзбекстандын чет өлкөлөрдөгү элчиликтеринин ишмердүүлүгүнө арналган. Анда Мирзийоев кызматкерлерге кайрылып, натыйжалуу иштебегендерге карата чара көрүлө турганын айткан.

"Эгер кимдир бирөөлөр көз карашын өзгөрткүсү келбей, баары мурдагыдай эле боло берет деп ойлосо өтө жаңылышат. Андай адамдардын баары кызматынан кол жууп, алган айлык акысын кайра төлөп беришет. Ирригациялык окуу жайдын ректору жумуштан бошотулганда ал акыркы үч жылда алган айлыгын кайра мамлекетке төлөгөн. Ошол сыяктуу эле үч министр жумуштан алынды. Эми алар да айлыгын кайтарат", - деди Мирзийоев.

Өзбек президенти чет өлкөдөгү элчиликтерге кайрылып, инвестиция, туризм тармагын жакшыртуу талаптарын койгон.

"Мага кагаз жүзүндөгү маалыматтар керек эмес. Мен силердин маалыматыңарга муктаж эмесмин, анын баарын интернеттен окуп алам. Мага экспорт керек, мен элди камсыздашым керек. АКШ өзүнүн каржылык жетишсиздигин экспорт аркылуу толтурганы жатат. Биз эмнеге аны жасай албайбыз? Өлкөнүн келечеги инвестициядан көз каранды экенин унутпагыла! Инвестиция болгон учурда гана жаңы жумуш орундары түзүлөт, жарандардын кирешеси артат. Ар бир турист, ар бир доллар бүгүн биз үчүн маанилүү", - деп айткан Мирзийоев.