Орусияда кызуу талкуу жараткан Диана Шурыгинаны зордуктаган студент эркиндикке чыкты

Орусияда кызуу талкуу жараткан Диана Шурыгина аттуу кызды зордуктаганы үчүн камакка алынган Сергей Семёнов мөөнөтүнөн мурда эркиндикке чыкты. Бул жаңылык жаңыдан унутулуп жаткан окуяны кайрадан элдин эсине салып, ого бетер талкууну күчөттү. Баарынан кызыгы Сергей Семёнов эркиндикке чыккан күндүн эртеси орустардын "Россия-1" телеканалындагы "Прямой эфир" берүүсүнө чакырылса, Диана Шурыгина ошол эле күнү бир аз гана убакыт айырмачылык менен Биринчи каналдын "Пусть говорят" берүүсүндө конокто болгон.

Маалым болгондой, 3 жылга эркинен ажыратылган Семёнов мурда соттолбогону жана "Пусть говорят" берүүсүнө тартылган гонорарын кайрымдуулукка жумшаганы үчүн 1 жылдан соң эркиндикке чыккан. Ал залдагы элдин суроолоруна токтоолук менен жооп берип, эмоцияга алдырган эмес.

Ал эми Шурыгина мындай чечимге азыркыга чейин таң калып бүтө албай жатканын айткан.

"Мен бул кабарды укканда нес болдум. Эмнеге мынча эрте? Ал бул аралыкта эч нерсени түшүнгөн жок, болгону өзүн "баатыр" сезип жүрөт", - деген ал. Андан соң залдагы элдин ар кандай сөздөрүнөн тажаган кыз студиядан чыгып кетип, бир аздан соң жолдошу менен кайтып келген.

Белгилей кетсек, Шурыгина Сергей Семёнов аттуу студент баланы зордуктоо боюнча айыптаган. Бирок Семёнов жыныстык катнашка эки жактын тең макулдугу менен барганын айтып, зордуктаганын моюнга алган эмес. Жыйынтыгында сот студентти 8 жылга эркинен ажыратса, кийинчерээк жогорку инстанциядагы сот Семёновду 3 жыл, 3 айга кескен.