"Манас" аэропорту: "Аэропорттогу кафе, буфеттерди ижарачылар иштеткендиктен андагы баага көзөмөл кыла албайбыз"

"Манас" эл аралык аэропортунда сатылып жаткан тамак-аш, суусундуктардын бааларын аэропорттун администрациясы көзөмөлгө ала албайт. Бул тууралуу аталган мекеменин маалымат катчысы SUPER.KG порталына кабарлады.

Буга чейин социалдык тармактын колдонуучусу жеке баракчасына аэропорттогу абал нааразычылыкты жаратканын жазгандыгы маалымдалган. Анда шарттын жоктугунан тышкары азыктар кымбат сатылары, 1 стакан чайдын баасы 100 сомго чейин жеткендиги белгиленген.

Бул боюнча мекеменин маалымат катчысы андагы кафе, буфеттердин баарын ижарачылар иштете тургандыгын билдирип төмөнкүлөргө токтолду.

"Аэропортто ижарага берилген ар түрдүү ашкана, кафе жана буфеттер бар. Аларда суусундук, тамак-аштын баасы ар кандай. Мисал келтирсек, бир ашканада 1 кружка кофенин баасы 20 сом болсо, кээ биринде анын баасы 100 сомдон ашат, ижарачылар тейлөө шартына, товарынын сапатына жараша түрдүү баа коёт, биз алардын сатып жаткан тамак-аштарынын баасына кийлигише албайбыз".

Мындан тышкары ал социалдык тармакта аэропорттогу шарттарга нааразы болгон Нуркан Койчуманова аттуу колдонуучунун билдирүүсүнүн айрым учурлары чындыкка дал келбей тургандыгын белгиледи.

"Эне жана бала бөлмөсүндө негизинен энелер балдары менен жатыш керек. Бирок ал жакка 30 жаштан ашкан эркектер да кирип жатып алышат, алар бул бөлмөдө болбошу керек. Анткени бул бөлмө чакан, көп кишиге ылайыкташкан эмес. Бөлмөгө жылуулук берилген, андан тышкары адамдардын көптүгүнөн мынчалык суук болбойт.

Авиаташуулардын эрежелерине ылайык, каттамы кармалган жүргүнчүлөрдү авиакомпаниялар тамак-аш жана жатакана менен камсыз кылыш керек. Каттам 4 саатка кармалса авиакомпания тамак-аш менен камсыз кылат, ал эми 8 сааттан ашып кетсе авиакомпания жүргүнчүлөрдү жатаканага жайгаштырыш керек. Жүргүнчүлөр тийиштүү талаптарды авиакомпанияларга коюусу зарыл", - деп айтылат маалыматта.