Ленин РИИБи оор кылмышка шектүү жаранды кармады

Бишкектин Ленин РИИБинин кызматкерлери  "адамды кыйнап өлтүргөн" деген шек менен 5-июнда Евгений К. аттуу жаранды кармашты. Бишкек ШИИББи билдиргендей, 3-июнда аталган РИИБине Рыскулов-Үмөталиев көчөлөрүнүн кесилишинде адамдын жансыз денеси жаткандыгы боюнча билдирүү түшкөн. Ыкчам-тергөө тобу окуя болгон жерге барып, 30-35 жаштардагы адамдын кыйнап өлтүрүлгөндүгүнө күбө болушкан. Бул факты боюнча Кылмыш кодексинин 97-беренесине ылайык кылмыш иши козголгон. Кармалган жаран күнөөсүн моюнга алып, таанышы Александрдын ичине бычак сайып салганын айтып берди. Учурда тергөө амалдары жүрүүдө.