Кирпигине муз тоңгон кыздын сүрөтү кызуу талкууга алынууда

Орусиянын Якутск шаарынын 24 жаштагы тургуну Анастасия Груздеванын социалдык тармактардын бирине жүктөгөн сүрөтү тез арада популярдуулукка ээ болуп, коомчулуктун кызуу талкуусун жаратты. Анда Груздева кирпиктерине муз тоңгон сүрөттү жүктөп, төмөнкүдөй билдирүү калтырган.

"Бизде 50 градуска чейин суук. Азыр Якутскта жашаган ар бир адамда дал ушундай сүрөт бар болуш керек. Көчөдө тоңуп калбастан аман жашап жүрөбүз. 2 жыл мурун да дал ушундай сүрөт жүктөгөм, ошону жаңыртып коюуну чечтим", - деген ал.

Анын бул сүрөтү дароо кызуу талкууга алынып, көпчүлүктүн таң калуусун жараткан. Ал гана эмес болгону 7000 катталуучусу бар экенине карабастан, аз убакытта 32 миңге жакын "жакты" белгисине татыган. Кирпигине муз тоңгон кыз бул чыныгы сүрөт экенине ишенбегендер үчүн видео да жүктөөгө жетишип, анын бул сүрөтү мынчалык популярдуу болуп кете турганын ойлобогонун айткан.