Ахматбек Келдибековдун доктордук диссертациясы эмне үчүн жарабай калганы айтылды

Жогорку Кеңештин экс-депутаты Ахматбек Келдибеков "Кыргыз Республикасынын мамлекеттик фискалдык саясатынын базар экономикасынын шартындагы социалдык-экономикалык натыйжалуулугу" деген аталыштагы доктордук диссертация жазган. Бул тууралуу бүгүн, 17-январда SUPER.KG порталына Кыргыз экономикалык университетинин илим боюнча проректору Көбөгөн Атышов билдирди.

Атышовдун айтымында, 2017-жылы Ахматбек Келдибековдун диссертациялык иши талкууга алынган.

"Диссертациялык кеңештин мүчөсү жана илим боюнча проректор катары талкууга өзүм катышкам. Аны менен илимий жетекчиси жана 4-5 илимдин доктору болгон. Келдибеков жазган иштин шифрлери ылайыктуу эмес. Иши дагы начар жазылыптыр. Иштин сапатына карап жараксыз деп таптык", - дейт ал.

Айта кетсек, Ахматбек Келдибеков Жогорку Кеңештин III жана V чакырылышынын депутаты болгон. 2010-жылы Жогорку Кеңештин төрагасы болгон. Ал "кызматтык абалынан кыянаттык менен пайдалануу" беренеси боюнча айыпталган. 2017-жылы 8-ноябрда соттуулугу жоюлган.