Улуу Британиянын премьер-министри жалгыздыкты жоюу кызматын түздү

Улуу Британиянын премьер-министри Тереза Мэй жаңы кызматты түздү. Бул тууралуу чет элдик басылмалар жазууда.

Маалыматта жазылгандай, өкмөт башчы Маданият, спорт, коммуникация жана санариптик технологиялар министрлигинин жалгыздык менен күрөшүү боюнча орун басары жаңы кызматын түзгөн.

Буга Британиянын 9 миллионго жакын эли жалгыздыктан азап тарткандыгы себеп болгон. Бул кызматка дайындалган Трейси Крауч аттуу айым эми бул "социалдык эпидемия" менен күрөшүү иштерин жүргүзөт.

Тереза Мэй жалгыздык абдан көп адамдар үчүн азаптуу жашоо экенин билдирген: "Биз, баарыбыз биргеликте көптөгөн улгайган адамдар азап чегип жашаган жалгыздык менен күрөшүүгө күч жумшашыбызды каалайм. Анын арасында ден соолугунун мүмкүнчүлүгү чектелген жакын адамын карагандар, жакынын жоготкондор жана жөн гана баарлашууга эч кимиси жоктор бар", - деген.

Ошондой эле премьер-министр бул көйгөйдү жоюу үчүн бир катар министрликтер дароо жалпы стратегияны иштеп чыга турганын айткан. Жергиликтүү кайрымдуулук фонддордун бири өздөрүнүн жүргүзгөн изилдөөлөрүнө таянып, орто эсепте 200 миңге жакын британиялык достору же туугандары менен 1 айдан ашык убакытка чейин баарлашпаганын маалымдаган. Азаптуу жалгыздыктан ден соолугунун мумкүнчүлүгү чектелген өспүрүмдөрдүн 85 пайызы да жабыркагандыгы белгилүү болгон.

Ал эми эксперттер адамдардын көп убакыт бою жалгыз жүрүүсү ден соолук үчүн чылым тарткан сыяктуу эле зыян экенин айтышкан. Алар жалгыздык адамдын психикалык саламаттыгына олуттуу зыян келтирип, эрте өлүмгө алып келүү коркунучу 3 эсеге көбөйөрүн белгилешкен.