Омск шаарында жеңил кийимчен 5 жаштагы кыз мас абалда көчөдө жүргөн жеринен полицияга өткөрүлүп берилди

Орусиянын Омск шаарында жашоочулар жеңил кийинип алып, мас абалда көчөдө жүргөн 5 жаштагы кызды байкашкан. Бул тууралуу жергиликтүү маалымат булактары жазууда.

Маалыматка ылайык, жалгыз жүргөн наристе кызды байкагандар жакынкы дүкөнгө алып барышып, ал жерден полицияга кабарлашкан.

Чакырылган жерге келген полиция кызды медициналык мекемеге алып барып текшерткенде анын канында спирт ичимдиги бар экендиги аныкталган. Андан соң тартип сакчылары мурда сот жоопкерчилигине тартылган жергиликтүү жашоочунун кызы экенин билген.

"Кызды алып үйгө барган полиция кызматкерлери ал жерде мас абалында уктап жаткан 35 жаштардагы эркек кишини табышкан. Суракка алганда ал аялы жумушка кеткен учурда кызын карап жатып, спирт ичимдиктерин ичип мас болуп калганын айткан. Кыздын атасына аталык милдетин так аткарбагандыгы жана жашы жете элек баланы карап жатып алкоголдук ичимдиктерин ичкен деген негизде протокол түзүлгөн. Учурда үй-бүлөнүн абалын иликтөө иштери улантылууда. Ал эми кыздын ден соолугуна кооптуу эч нерсе жаралган эмес", - деп жазылат маалыматта.

Анда белгиленгендей, шаардык тургундар наристе кызды 16-январда саат 18:00дөрдө табышкан.