Экотехинспекция: "Автоунаалардын түтүнүн текшерүү иштери жүрүүдө"

Мамлекеттик экологиялык жана техникалык коопсуздук боюнча инспекция Бишкек шаарындагы түтүндүн ченемден жогору болушунан улам автоунааларды текшерүүнү баштады. Бул тууралуу инспекциянын басма сөз кызматы билдирди.
Маалыматка ылайык, автоунаалардан чыгып жаткан зыяндуу түтүндү нормага келтирүү үчүн, унааларды экологиялык кароодон толук өткөрүү зарыл.

"Белгиленген нормадан ашыкча иштетилип чыккан уулуу заттар, адамдын өмүрүнө коркунуч жаратат. Бул багытта инспекциянын экологдору атайын текшерүү иштерин жүргүзүүдө. Көпчүлүк учурда тийиштүү нормадан ашыкча уулуу затты бөлүп чыгарып жаткан унаалар, эскирген же болбосо техникалык абалынын начардыгынан улам келип чыгат. Абаны ар кандай уулуу затка булгап жаткан унаалар гана эмес, коомдук жайлардагы жуунуучу жеке мончолор, өндүрүш ишканалары жана көмүр колдонгон жеке турак жайлар болуп саналат. Андыктан инспекторлордун текшерүүсүнүн негизинде экологияга ашыкча зыян алып келип, абаны булгап жаткандарга чара көрүлөт. Себеби буга чейин жеке мончолордо ар кандай желим жана тигүү цехтеринин калдыктары, дөңгөлөктөр жана эски бут кийимдер жагылып, жагымсыз жыт чыгып жатканы тууралуу коомчулук тарабынан мекемеге арыздар келип түшкөн. Мындан кийин абаны булгагандарга айып пулдан сырткары иштетип жаткан ишканасын токтотуу чаралары дагы көрүлөт. Жеке объектилерде мындай көрүнүштөр өтө көп катталууда", - деп жазылат маалыматта.