Уйкусун бузган мышыгын 13-кабаттан ыргытып жиберген адамга кылмыш иши козголду

Екатеринбург шаарынын тургунуна уйкусун бузган мышыгын 13-кабаттан ыргытып жибергени үчүн кылмыш иши козголду. Бул тууралуу орус басылмалары жазып чыгышты.

Маалым болгондой, аталган шаардагы Павл Шаманов көчөсүнүн 1980-жылы туулган жашоочусу мас абалында өзүнүн мышыгын 13-кабаттын балконунан ыргытып жиберген.

"Бул батирде негизинен Сёма жана Симба деген эки мышык жашаган. Окуя болгон күнү мышыктардын ээси досу менен алкоголдук ичимдиктерди ичкен. Досу үйүнө кеткен соң ал уктоо үчүн жаткан. Уктап жаткан мезгилде мышыктар бири-бири менен урушуп, ээсинин тынчын алган. Ызы-чууга чыдабаган ал мышыктардын бирөөсүн балкондон ыргытып жиберген. Мышык алган жаракатынан улам өлүп калган", - деп жазылган маалыматта.

Белгилүү болгондой, бул окуя боюнча кылмыш иши козголгон. Орусиянын мыйзамдарына ылайык жаныбарларга ырайымсыздык менен мамиле кылгандыгы үчүн кылмышкер 3 жылдан 5 жылга чейин эркинен ажыратылышы мүмкүн.