Дональд Трамп Нурсултан Назарбаев үчүн АКШнын 5-президенти

16-18-январь күндөрү Казакстандын лидери Нурсултан Назарбаев АКШга расмий иш сапары менен барып президент Дональд Трамп менен жолугушту.

Көпчүлүк саясий серепчилер белгилегендей, Трамп Назарбаевди жылуу тосуп алды. АКШнын президенти эки өлкөнүн мамилеси жакшы экенин айтып, Казакстан АКШнын Орто Азиядагы эң мыкты өнөктөшү экенин белгилеп өттү. Расмий сапардын алкагында өлкө башчылары бир нече келишимдерге кол коюшту.

Казакстанды 28 жылдан бери башкарып келген Назарбаев үчүн Дональд Трамп эсеп боюнча АКШнын 5-президенти.

Казак журт башчысынын АКШга болгон эң алгачкы расмий иш сапары 1992-жылы май айында болгон. Бул мезгилде АКШнын бийлик башында Жорж Буш турган. Аталган жолугушууда бир катар келишимдерге кол коюлуп эки өлкөнүн ортосундагы мамилеси тууралуу меморандум кабыл алынган.

Экинчи ирет Назарбаев АКШга расмий иш сапары менен 1994-жылы февраль айында барган. Анда АКШны Билл Клинтон башкарып турган. Бул сапарда келишимдерге кол коюлган, алардын ичинен ядердик куралды таратпоо боюнча келишимге кол коюлган.

Атасынын жолун жолдоп өлкө башчысы шайланган Жорж Буш (кичүүсү) Назарбаевди 2006-жылы Ак Үйдө кабыл алган.

АКШнын тарыхында эң алгачкы кара терилүү жана 44-президенти болуп шайланган Барак Обама менен Назарбаев алгачкы жолу Вашингтондо өткөн ядердик коопсуздук боюнча саммите 2010-жылдын апрель айында жолуккан.

Өз саясий жолунда АКШнын 5-президенти Дональд Трамп менен жүз көрүшүп жаткан Назарбаев.