Жол кыймылына тоскоолдук жараткан объекттерди алууга багытталган мыйзам сунушталууда

Бүгүн, 18-январда Жогорку Кеңештин жыйынында "Автоунаа жолдору жөнүндө" мыйзамына өзгөртүү киргизүү тууралуу" мыйзам долбоору талкууланды.

Мыйзам долбоору боюнча баяндаманы транспорт жана жолдор министри Жамшитбек Калилов жасады.

Анда министр мыйзам кабыл алынса, жол боюнда жайгашып калган, жол кыймылына тоскоолдук жараткан объекттерди алуу милдети жүктөлө турганын айтты.

КСДП фракциясынан депутат Сайдолимжон Жураев учурда жол боюнда жайгашкан дүкөн, кафелердин саны өсүп жатканын айтты. "Кафе, дүкөндөрдүн жанында унаа токтотконго жер жок. Мындан улам унаалар жол четине коюлуп, кыймылга тоскоолдуктарды жаратууда", - деди Жураев.

Калилов талаш жараткан маселенин баарысы мыйзам менен жолго салына турганын айтты.

"Көп учурда биздин макулдугубуз жок эле курулуштарга уруксат берилип кетет. Жол кыймылына тоскоолдук жараткан объекттердин баарысы алынышы керек", - деди Калилов.