ТИМ: "Казакстанда күйүп кеткен автобуста каза болгондордун жана жаракат алгандардын арасында Кыргыз жарандары жок"

Бүгүн, 18-январда Казакстанда 52 адам күйүп кеткен автобустун ичинде калып каза болду. Автобустун ичинде 55 жүргүнчү, эки айдоочу болгон. Ал эми 5 адам ар кандай жаракаттарды алышкан. Кыргыз мамлекетинин Тышкы иштер министрлигинин маалымат кызматынан SUPER.KG'ге кабарлашкандай, алардын арасында Кыргыз жарандары жок. "Казакстандагы консул менен байланышканыбызда, алдын ала алынган маалыматтарга таянып каза болгон жана жаракат алгандардын арасында биздин жарандарыбыз жок экендигин билдиришти", - дешти ТИМден.

Маалыматтарга караганда, кырсык Казакстандын Ак-Төбө облусунда жергиликтүү убакыт боюнча саат 10:30 чамаларында катталган. Өлкөнүн Өзгөчө кырдаалдар комитетинин өкүлү Руслан Иманкуловдун айтымында, Самара-Ташкент багыты боюнча каттамдагы Икарус үлгүсүндөгү автобус облустагы Калыбай деген айылдын тушуна келгенде күйүп кеткен. Алдын ала маалыматка караганда, автобустун ичинде каза болгондордун баары Өзбекстандын жарандары экени айтылууда.