Салянованын соттук иши 24-январга жылдырылды

Бүгүн, 18-январда Бишкек шаардык сотунда Жогорку Кеңештин депутаты Аида Салянованын соттук иши каралмак. Анын жактоочусу Чынара Жакупбекова ишти карап жаткан соттук жамаатка депутат жүрөк дартынан улам ооруканада жаткандыктан отурумду жылдыруу өтүнүчүн келтирди. Соттук жамаат жактоочунун өтүнүчүн канааттандырып, ишти 24-январь күнү улантууну чечти.

Саляновага жүрөк клапанынын өнөкөт ичкерүүсү деген диагноз коюлуп, 10 күндөн бери ооруканада жатат.

Эскерте кетсек, Салянова "Юстиция министри болуп турганда кылмыш жасаганы үчүн издөөдө жүргөн Алексей Елисеевдин адвокаттык лицензиясын узарткан" деп айыпталып, 2017-жылдын 10-октябрында Ленин райондук соту тарабынан күчөтүлгөн тартипте 5 жылга эркинен ажыратылган. Сот өкүмү анын 2 жаштагы наристеси 14 жашка толгондо күчүнө кирет. Бул чечимге нааразы болгон Салянова шаардык сотко даттанган.