Депутат: "Жол кыймылынын инспекторлорунун кийими эле алмашты, ишинде натыйжа жок"

Бүгүн, 19-январда Жогорку Кеңештеги "Республика-Ата Журт" фракциясы жол коопсуздугу боюнча жыйын өткөрүүдө. Анда депутат Калдарбек Баймуратов Патрулдук милиция жоюлганы менен, жол кыймылынын көзөмөлдөөчүлөрүнүн аталышы, унаасынын сүрөттөрү, кийими эле алмашып, жумушунда жыйынтык болбой жатканын айтты.

"Унаалардын сүрөтү менен эле кызматкерлердин кийимдери өзгөрдү. Азыр башка эч нерсе өзгөргөн жок. Кызматкерлер мурдагы эле орундарында турат, ошол жерден эле айып акчаларды чогултуп турушат. Бишкек шаарында 400 кызматкер кошумча алынып жатканда ар бир мектептин алдында бирден жол кыймылын көзөмөлдөөчү кызматкер турат деп айтылган. Мен бир да мектептин алдынан көрө элекмин. Казакстанды карабайсыңарбы, кызматкерлер көчөдө турбастан шаар аралап, ким мыйзам бузган болсо артынан кууп жүрүп, токтотуп күрөшүп жатат", - деди Баймуратов.

Ички иштер министринин орун басары Курсан Асанов депутатка жооп кылып, жол кыймылын көзөмөлдөөчүлөрдүн ашыкча милдеттери алынганын айтты.

"Аталыш өзгөрдү. Мурда Патрулдук милиция 5-6 функцияны аткарчу эле. Азыр кызматкерлер жол кыймылынын камсыздоо боюнча бир эле функция аткарышат. Азыр күбөлүк алуу боюнча сынактарга катышып жатабыз. Азыркы күбөлүктөрдүн 50 пайызы жараксыз болууда", - деди Асанов.