Жол кыймылынын инспекторлорунун жаңы формаларына бюджеттен 1 миллион 700 миң сом коротулду

Жол кыймылынын коопсуздугу башкармалыгынын кызматкерлери үчүн формаларга бюджеттен 1 миллион 700 миң сом коротулду. Бул тууралуу бүгүн, 19-январда Жогорку Кеңештеги "Республика-Ата Журт" фракциясынын жол коопсуздугуна арналган жыйынында мекеменин жетекчиси Канат Жумагазиев билдирди.

Депутат Жыргалбек Турускулов Жумагазиевге кайрылып, кызматкерлерди жаңы форма менен камсыз кылбай, жол кыймылын көзөмөлдөөчүлөрдү өз эсебинен алууга мажбурлап жатканын айтты.

"Айрым кызматкерлер айтып жатышат, бирок ачык айткандан коркушат экен. Силер "формаларды өз эсебиңерден алгыла" деп айтып жатыптырсыңар", - деди Турускулов.

Жол кыймылынын коопсуздугу башкармалыгынын башчысы Жумагазиев берилген формалар жетишпей жатканын айтты.

"Биз биринчи кезекте көчөдө турган кызматкерлерди форма менен камсыздадык. 1 миллион 700 миң сомго форма алганбыз. Бул бардык кызматкерлер үчүн жетишсиз, ошондуктан айрым кызматкерлер өз чөнтөгүнөн формасын алмаштырууга аргасыз болуп жатат", - деди Жумагазиев.