Депутат Жээнбеков: "Мурда бир да унаа техникалык кароодон өтчү эмес, баары эле коррупциялык жол менен өтүп келген"

Бүгүн, 22-январда Жогорку Кеңештеги агрардык саясат, суу ресурстары, экология жана регионалдык өнүктүрүү боюнча комитети өлкөдө ЕАЭБ талаптарына ылайык экологиялык таза мунайга өтүү маселесин карады.

Долбоор боюнча, өлкөдө бензинди евро стандарттагы категорияга өткөрүү пландалган. Анда депутат Асылбек Жээнбеков таза бензинге өтүү менен Бишкектеги негизги түтүн маселесин чечүүгө болорун айтты.

"Бүгүнкү күндө абанын булганышынын эки себебин айтып жатабыз. Бири автоунаадан чыккан түтүн, экинчиси жеке үйлөрдө көмүр жагуудан чыккан түтүн. Эми биз үйлөрдү карабай эле туралы. Унааларды караганда, абаны таза кармоо үчүн күйүүчү майдын сапатын жакшыртуу керек. Техникалык кароону киргизебиз деп жатасыздар. Техникалык кароо менен маселе чечилбейт. Бишкекте мындан төрт эсе унаалар аз кезде деле биз аны көзөмөлгө ала алган эмеспиз. Анда бир да унаа техникалык кароодон өткөн эмес, баары эле коррупциялык жол менен өтүп келген. Ошондуктан бензинди ЕАЭБдин стандартына өткөрүү жолу менен түтүн маселесин чечсек болот", - деди Жээнбеков.