Балдар интернатындагы тарбиялануучулардын 95 пайызынын ата-энеси бар экени айтылды

Бүгүн, 22-январда Жогорку Кеңештин Социалдык маселелер, билим берүү, илим, маданият жана саламаттыкты сактоо боюнча комитетинин жыйынында жетим балдар жана ата-энесинин көзөмөлүсүз калган балдарды социалдык колдоо боюнча өкмөт тарабынан көрүлүп жаткан чаралар жөнүндө маалыматы угулду.

Анда вице-премьер-министр Чолпон Султанбекова балдар интернатындагы абал боюнча маалымат берди.

"83 балдар үйүндө 3360 бала тарбияланууда. Алардын ичинен 680 бала томолой жетимдер. Калгандардын атасы же апасы бар. Айрым балдардын атасы да, энеси да бар. Жалпысынан алганда 95 пайыз балдардын ата-энеси же ата, апасынын бири бар", - деди Султанбекова.

"Интернатта үч маал тамак-аш берилип, окуу куралдары акысыз болгондуктан жакын жашаган айылдардагы ата-энелер балдарын жайгаштырып жатат. Мурда соттун чечими менен кабыл алынчу. Азыр кабыл алууда ага да карабай калышыптыр. Ошондуктан учурда бул тармак чоң реформанын алдында турат деп айта алам", - деп кошумчалады вице-премьер.