Филиппиндин президенти аскерлерге: "Эгер мөөнөтүмдөн ашыкча бийликте калсам, мени атып салгыла"

Филиппиндин президенти Родриго Дутерте эгер ал мөөнөтүнөн ашыкча ээлеген кызматында кала берсе, аны атып салууга аскерлерге уруксат берди. Бул тууралуу ал аскер базасына барганда айтканын чет өлкөлүк басылмалар жазышты.

"Эгер мен өз мөөнөтүмдөн ашыкча кызматымда кала берип диктатор болгум келсе, мени атып салгыла, тамашалаган жокмун", - деди Дутерте. Анын айтымында, аскер кызматкерлери Конституцияны өзгөртүүгө жана бурмалоого жол бербеш керек. "Конституцияны жана жарандарды коргоо - бул силердин жумушуңар. Унутпагыла, бул силердин ыйык милдетиңер", - деп кайрылды аскерлерге президент.

Буга чейин өлкө башчынын тарапташтары парламентте жаңы Конституцияны кабыл алып, федеративдик мамлекеттик түзүлүшкө өтүүнү сунушташкан. Буга байланыштуу президент 2022-жылдан кийин кызматында кала бермек.

Оппозиция өкүлдөрү Дутертени президенттик мөөнөтүн узартууну көздөп жатат деп күнөөлөшкөн. Алардын пикиринде, Конституцияны өзгөртүү өлкөдө 1965-1986-жылдардагыдай диктатураны орнотууга алып келет.