Шадиев: "Күзгө чейин Бишкектин борбордук көчөлөрүнөн кичи автобустар чыгарылат"

Бүгүн, 23-январда Жогорку Кеңештеги Эл аралык иштер, коргоо жана коопсуздук боюнча комитетинин жыйынында депутат Абдывахап Нурбаев Бишкек мэриясына электр тогу менен жүргөн автобустарды алууга сунуш кылды.

"Жакында өкмөт жаңы автобустарды сатып алабыз деп жатат. Мен сунуш кылат элем, электр тогу менен жүргөн автобустарды алыш керек. Кытайдан көрүп келдик, бүт автобустары ток менен жүрөт экен. Ош шаары сатып алган автобустар өтө көп бензин кетирип азыр өзүн өзү актабай жатат. Ошондуктан ушул жылдан бюджеттен алына турган автоунаалардын да электр тогу менен жүрө турганын алууга өтсөк. Өткөн жылы бюджеттен автоунааларды алууга 1 миллиард сом кетти. Бул чоң каражат", - деди Нурбаев.

Биринчи вице-премьер-министр Аскарбек Шадиев жаңы алына турган автобустар боюнча учурда Орусия менен келишимге кол коюлуп калганын айтты.

"Газ менен жүрө турган автобустарды сатып алабыз деп Орусия менен келишимге кол коюлуп калды. Ошондуктан бул жолу электр тогу менен жүргөн автобустарды ала албай калабыз. Азыр Бишкекте 350 автобус алып келүүнүн үстүндө иштер жүрүүдө. Буюрса, бул сентябрь айына чейин чечилет. Күзгө чейин Бишкектин борборлорунан кичи автобустар чыгарылат", - деди Шадиев.