Бүгүн БШК Өмүрбек Бабановдун мандатын Абдыбек Дүйшалиевге тапшырат

Бүгүн, 24-январда Борбордук шайлоо комиссиясы Өмүрбек Бабановдун мандатын Абдыбек Дүйшалиевге тапшырат. Бул тууралуу SUPER.KG порталына комиссиянын төрайымынын орун басары Абдыжапар Бекматов билдирди.

Эске салсак, 19-январда БШК Өмүрбек Бабановду депутаттык мандатынан ажыраткан. 30-декабрда Өмүрбек Бабанов депутаттык мандатын тапшырып, саясаттан биротоло кете турганын жарыялаган.

4-ноябрь күнү Жогорку Кеңештеги "Республика-Ата Журт" фракциясынын лидери Өмүрбек Бабановго карата "улуттар аралык кастыкты козутуу" жана "Конституциялык түзүлүштү күчкө салып өзгөртүүгө эл алдында чакырык жасоо" беренелеринин негизинде кылмыш иши козголгон. Тергөө иштерин жүргүзүү УКМКга жүктөлгөн.

2017-жылдын октябрь айындагы президенттик шайлоодон кийин Өмүрбек Бабанов өлкөдөн чыгып кеткен боюнча кайтып келе элек. Айрым маалыматтарга караганда, анын Орусияда дарыланып жатканы айтылат.

Айта кетсек, Абдыбек Дүйшалиев 55 жашта. Ал буга чейин Мамлекеттик каттоо кызматынын Унаа транспортторду жана айдоочулар курамын каттоо департаментинин директору болгон.