UFC уюмунун мушкери Хабиб Нурмагомедов тууралуу кызыктуу фактылар

Эрежесиз уруш чебери, UFC уюмунун эң беделдүү мушкерлеринин бири болгон орусиялык Хабиб Нурмагомедов Бишкек шаарына келди. Ал Кыргыз өлкөсүнө биринчи жолу келгенин жана бул жакта күйөрмандарынын көп экенин биле турганын билдирген.

UFC жылдызы тууралуу кызыктуу маалыматтарды анын күйөрмандарына сунуштайбыз.

Толук аты-жөнү – Нурмагомедов Хабиб Абдулманапович

Туулган жылы, күнү – 1988-жыл, 20-сентябрь

Туулган жери – Орусия, Дагестан Республикасы, Цумадин району

Улуту – Авар

Бою – 179 сантиметр

Салмагы – 70 килограмм

Хабибдин атасы Абдулманап кезинде эркин күрөш жана самбо боюнча Украинанын чемпиону болсо, атасынын агасы Нурмагомед самбо боюнча Дүйнө чемпиону аталган.

Хабиб 6 жашынан тарта күрөш, дзюдо жана самбо менен машыгып, көчөдө чоң муштум болгондуктан атасынын катуу тарбиясынын астында чоңойгон. Атасы уулун азыркыга чейин машыктырып келет.

Нурмагомедов 21 жашка чейин эле панкратион боюнча Европа чемпиону, самбо жана грепплинг боюнча Дүйнө чемпиону аталууга жетишкен. 2012-жылдын январь айында UFC уюмунда алгачкы беттешин өткөргөн.

29 жаштагы мушкер жеңил салмак категориясында Конор Макгрегор менен чемпиондук үчүн беттеш өткөрүүгө бардык аракетин жумшаган деп айтылат. Бирок ал расмий түрдө тастыкталган эмес. Бирок 2017-жылы беттешке бир нече саат калганда Хабиб Нурмагомедов ооруканага жатып калып, беттеш токтотулган.

Конор Макрегор чемпиондук курдан ажыраган соң Хабиб Нурмагомедов менен Тони Фергисон чемпиондукка талапкер болууда. Эки мушкердин беттеши 7-апрелде АКШнын Нью-Йорк шаарында өтөт.

Ошондой эле Хабиб мушташта тизесинен алган жаракатынан улам бир жыл дарыланса, 2015-жылы кабыргасын сындырып, 2016-жылга чейин беттешке чыккан эмес. Жалпысынан, 2013-жылдан бери 5 оор операцияны башынан өткөргөн.

Хабиб биринчи UFC беттешинде 16 миң доллар алса, акыркы беттешинде 57 миң доллар алган. Ал эрежесиз урушта жалпы 25 беттеш өткөрүп бардыгында жеңишке жетишкен жана UFC уюмунун алкагында 9 беттеш өткөргөн. Анын Инстаграмдагы баракчасына 3,4 миллиондон ашык колдонуучу жазылган.