Абдыбек Дүйшалиев: "Бабановдун ордуна депутат болуп келем деп ойлогон эмесмин"

"Өмүрбек Бабановдун ордуна депутат болуп келем деп ойлогон эмесмин", - деп бүгүн, 24-январда SUPER.KG порталына Бабановдун депутаттык мандатын алган Абдыбек Дүйшалиев билдирди.

"Депутат болуп өзүбүздүн ишибизди так аткарганга, элибиздин көйгөйлөрүн чечкенге баратабыз. Ишти байкап, көйгөйлөрдү чечебиз. Бабановдун ордуна депутат болуп келем деп ойлогон эмесмин. Ал киши өз каалоосу менен мандатын тапшырды. Буйрук экен, кезегим боюнча мандат алдым", - деди Дүйшалиев.

Абдыбек Дүйшалиев 2014-жылы Мамлекеттик каттоо кызматына караштуу Транспорттук каражаттарды жана айдоочулук курамды каттоо департаментинин директору болуп эмгектенген.

Эске салсак, 19-январда БШК Өмүрбек Бабановду депутаттык мандатынан ажыраткан. 30-декабрда Өмүрбек Бабанов депутаттык мандатын тапшырып, саясаттан биротоло кете турганын жарыялаган.

4-ноябрь күнү Жогорку Кеңештеги "Республика-Ата Журт" фракциясынын лидери Өмүрбек Бабановго карата "улуттар аралык кастыкты козутуу" жана "Конституциялык түзүлүштү күчкө салып өзгөртүүгө эл алдында чакырык жасоо" беренелеринин негизинде кылмыш иши козголгон. Тергөө иштерин жүргүзүү УКМКга жүктөлгөн.

2017-жылдын октябрь айындагы президенттик шайлоодон кийин Өмүрбек Бабанов өлкөдөн чыгып кеткен боюнча кайтып келе элек. Айрым маалыматтарга караганда, анын Орусияда дарыланып жатканы айтылат.