Чүй облусунун тургуну: "Үй салып алган жерлерибиз трансформация болбой, көйгөйдү акча менен чечүүгө аргасыз болуудабыз"

Бүгүн, 24-январда Аламүдүн жана Сокулук районунда 20 миңдей үй курулган жерлерди трансформациялоо талабы менен аталган эки райондун тургундары кайрадан Ак Үйдүн алдына митингге чыгышты. Алардын бири Арзыкан Кубатаева трансформациялоо маселеси чечилбегендиктен тургундар көйгөйлөрдү акча менен чечүүгө аргасыз болуп жатышканын айтты.

"Трансформациялоо маселеси бир канча жылдан бери чечилбегендиктен эл өтө кыйын абалда жашап жатат. Салган үйүбүз "үй" деген гана аты болбосо, балдарыбызды бала бакчага, мектепке бере албайбыз, насыя ала албай кыйналып жатабыз. Жакында эле неберемди ооруканага каттоого тургузам деп 3-4 айылды кыдырдым. Эч ким каттоого албай койгондо акыры бирине тыйын берип жатып көйгөйүмдү чечтим. Мен аргасыздан ушундай жолго бардым. Коррупциянын баары ушундай көйгөйлөрдөн улам пайда болуп жатат. Андан сырткары суу киргизели десек ага өкмөт уруксат бербейт. Свет киргизүү да чоң көйгөй. Трансформация бүтсө, бул маселелер чечилмек.

Биз өкмөттөн бир тыйын сураган жокпуз. Болгону жерлерди трансформациялоону чечип бергиле деп жатабыз. Бирок чечилчү маселе өкмөт жана Жогорку Кеңештеги айрым адамдардын кызыкчылыгынан улам токтоп турат", - деди Кубатаева.