Ташкентте денесинен 16 ийне табылып, анын 13ү операция жолу менен алынган ымыркай чарчап калды

Ташкентте денесинен 16 даана ийне табылган 11 айлык наристе чарчап калды. Бул тууралуу чет элдик жалпыга маалымдоо каражаттары жазууда.

Маалыматта жазылгандай, ымыркай 23-январда ага операция жасалган Ташкент шаарындагы Республикалык медициналык илимий борбордун жандандыруу бөлүмүндө каза болгон.

"11 айлык ымыркайга оор операция жасалып, денесинен 13 даана ийнени алып чыккандан кийин жашап кете алган жок", - деген Ташкенттеги демократия жана адам укуктары институтунун директору Сайера Ходжаева.

Буга чейин Өзбекстандын Фергана облусунда дарыгерлер 11 айлык баланын денесинде 16 даана ийне бар экендигин аныкташып, Республикалык илимий борборго жөнөтүшкөнү маалымдалган. Баланын дене табы көтөрүлүп, оор абалда борборго жеткирилген. Наристеге 9 саатка созулган операция жасалып, анын ичинен 13 даана ийне алынган. Баланын жаш курагына жана абалына байланыштуу калган 3 ийне кийинки операцияга калтырылган.

Дарыгерлер ымыркай мынча ийнени өзү жута албастыгын, бул кимдир бирөө тарабынан атайын жасалган иш болушу мүмкүн деген пикирин билдиришкен. Мындан тышкары ал денесиндеги ийнелер менен 2 айга жакын убакыт жашаган.

Баланын апасы анын тынымсыз ыйлаганынан улам ооруканага кайрылган. Ал күйөөсү Орусияда иштеп жүргөндүгүн, убактылуу өзүнүн ата-энесинин үйүндө жашагандыгын айтып берген.

"Мен баламды дээрлик кароосуз калтырган эмесмин, мындай абалдын жаралышы мага түшүнүксүз" деген апасы.