Өмүрбек Текебаевдин кызы Ай-Данэк Текебаева атасынын ооруканага которулушуна мүмкүнчүлүк түзүп берүүнү суранды

Саясатчы Өмүрбек Текебаевдин кызы Ай-Данэк Текебаева атасынын ден соолугуна байланыштуу ага дарыланууга мүмкүнчүлүк берүүнү суранды. Бул тууралуу ал өзүнүн социалдык тармактагы баракчасына жазып чыкты.

"Менин атам абдан күчтүү. Өмүрүмдө анын капалуу же оорулуу (ден соолугуна байланыштуу) болуп жүргөнүн көргөн эмесмин. Бирок чоңойгондо анын ден соолугунда көптөгөн көйгөйлөр бар экенин билдим. Ал болгону бизге ооруп жатканын билгизчү эмес. Атамдын жүрөгү ооруйт, бир канча жыл бою 1-2 жумага атайын жасалма аппарат тагып, анан айыкканда алып салып жүргөн учурлары болгон. Бир канча жолу ооруканага жатып чыккан, операция жасаткан. Азыркы учурда айрым адамдар атамды камакта жатып тажагандыктан, ооруканага которуу шылтоосун айтып жатат деп айыптап жатышат. Мен ошол адамдарга кайрылгым келет: Менин атам өзүнүн балдарына, жубайына көрсөтпөгөн алсыздыгын силерге таптакыр эле көрсөтпөйт. Эгер менин жазгандарымды биздин өлкө башчыбыз же атамды ооруканага которууга көмөк көрсөтө ала турган адамдар окуп жатышса, анда мен сиздерден адамгерчиликтүү болууну өтүнөм. Атама өлкөдөгү ооруканалардын биринен дарылануу мүмкүнчүлүгүн түзүп бергиле. Атамдын бизден канчалык алыс экенине карабай анын жашашын, ден соолукта болгонун каалайм. Баарыбызда тең ата, чоң ата жана балдарыбыз бар эмеспи. Мен силерден ушуну гана суранам", - деген ал.

Белгилей кетсек, 11 -январда Жогорку Кеңештин бир нече депутаттары экс-депутат Өмүрбек Текебаевди ооруканага которууну суранып, ЖАМКга кайрылуу жолдошкон.