"ЭЛДИК КАБАРга" жооп: "Ош облустук ооруканасында өчкөн жылуулук 1 сааттан кийин калыбына келтирилген" дейт министрлик

Ош облустук ооруканасында өчкөн жылуулук 1 сааттан кийин калыбына келтирилген. Бул тууралуу бүгүн, 27-январда Саламаттыкты сактоо министрлигинин басма сөз кызматынан билдиришти.

"Бул маселе боюнча биз Ош облустук ооруканасынын жетекчилери менен сүйлөштүк. Алар чындап эле кечээ, 26-январда шаардагы жылуулук берүүдөгү авариялык абалдан улам бир саатка жакын жылуулук өчкөнүн айтышты. Бирок бир сааттан соң кайра жылуулук берилип, учурда ооруканада жылуулук кадимкидей иштеп жатат", - деп билдиришти басма сөз кызматынан.

Айта кетсек, кечээ, 26-январда окурман "аба ырайы 30 градуска чейин суук болушу мүмкүн деген кабарлар айтылганы менен, Ош облустук ооруканасында жылуулук жок", - деп SUPER.KG порталынын "Элдик кабар" рубрикасына WhatsApp аркылуу кабарлаган.