Бишкек шаарын жылуулук менен камсыздоону калыбына келтирүү боюнча ыкчам штаб түзүлдү

Бишкек шаарын жылуулук менен камсыздоону калыбына келтирүү боюнча ыкчам штаб түзүлдү. Бул тууралуу бүгүн, 27-январда өкмөттүн басма сөз кызматынан билдиришти.

Маалыматка ылайык бүгүн, 27-январда өкмөт башчы Сапар Исаков Бишкек ЖЭБдеги түзүлгөн кырдаал боюнча ыкчам кеңешме өткөргөн. Анын жүрүшүндө ЖЭБдеги түзүлгөн кырдаал талкууланып, өкмөт башчы түзүлгөн абалга карабастан турак жайларга, өзгөчө социалдык объекттерге жылуулук жеткирүү боюнча ыңгайсыздыктар жаралбашы керектигин айткан.

Андан сырткары, Сапар Исаковдун тапшырмасы менен биринчи вице-премьер-министр Аскарбек Шадиев жетектеген ыкчам штаб түзүлгөн.

Ал ыкчам штабдын курамына киргендер:

Бишкек шаарынын мэри Албек Ибраимов;

Өнөр жай, энергетика жана жер казынасын пайдалануу мамлекеттик комитетинин төрагасы Улан Рыскулов;

Саламаттыкты сактоо министри Талантбек Батыралиев;

Экологиялык жана техникалык коопсуздук боюнча мамлекеттик инспекциясынын директору Канатбек Муратбеков;

"Улуттук энергетикалык холдинг компаниясы" ишканасынын төрагасы Айбек Калиев;

"Электр станциялары" ишканасынын башкы директору Узак Кыдырбаев;

"Кыргызстан улуттук электр тармагы" ишканасынын башкы директору Медетбек Айткулов;

"Түндүкэлектр" ачык акционердик коомунун башкы директору Искендер Кадыркулов;

"Бишкекжылуулуктармагы" ишканасынын башкы директору Эркин Абдыкалыков.