ЖЫЛНААМА, 28-ЯНВАРЬ: Ырыскелди Осмонкулов: "12 жылдан бери туулган күнүмдө бильярд боюнча турнир өткөрүп келем"

Бүгүн, 28-январда Кыргыз Республикасынын Эмгек сиңирген артисти Ырыскелди Осмонкулов 50 жашка толуп, өзүнүн юбилейин белгилеп жаткан учуру. SUPER.KG порталы ырчыны куттуктоо максатында байланышка чыгып, анын бүгүнкү күнгө койгон пландарын билди.

"12 жылдан бери туулган күнүмдө жакын досторум, сахналаш-санаалаштарым арасында бильярд боюнча турнир өткөрүп жүрөм. Быйыл да бул салтты бузбастан катуу даярдык көрүүдөмүн. Буюрса, кечинде кезектеги турнир башталат. Ал эми юбилейим менен алгачкылардан болуп, албетте, үй-бүлөм, жубайым жана балдарым куттукташты. Андан соң Берлин жана Ташкентте жашаган эжелерим байланышка чыгып, куттуктоо сөздөрүн арнашты. Азыр социалдык тармактагы досторум жазган жылуу пикирлерди окуп, маанайым абдан көтөрүлүп жатат", - дейт ырчы.

Ырыскелди Осмонкулов 1968-жылы 28-январда Сокулук районундагы Мыкан айылында туулган. 10 бир туугандын кичүүсү. 2-класстан кийин Фрунзедеги М.Абдраев атындагы музыкалык мектебине кирип, ал жакта Гүлнара Тойгонбаева, Светлана Назаренко, Жылдыз Осмоналиева, Актан Исабаев менен бирге билим алган. Музыкалык мектепти аяктаган соң М.Күрөңкеев атындагы музыкалык училищеге тапшырган. 1992-жылы “Инсан” тобунда ырдап, “Биздин Ала-Тоонун кыздары” деген ыр менен эл алдына чыккан. Ал эми 1996-жылы “Ай баратат” ыры менен жеке чыгармачылыкка киришкен. Ошондой эле бир нече эл аралык сынактарда кыргыздын желегин желбиретип келген. Ал эми 2003-жылы “Эмгек сиңирген артист” наамына татыса, 2017-жылы "Даңк" ордени менен сыйланган.

28-январдын жылнаамасы.