Бишкекте акыркы 2 күндө электр энергиясын пайдалануу жогорулагандыктан айрым райондор жарыксыз калды

Электр жабдыктарына күч келгендиктен Бишкектеги кичи райондордо жайгашкан айрым көп кабаттуу үйлөр жарыксыз калган. Бул тууралуу бүгүн, 29-январда SUPER.KG'ге "Түндүкэлектр" ишканасынын маалымат кызматынан кабарлашты. Учурда электр энергиясын калыбына келтирүү үчүн жалпы 34 бригада иштеп жатат.

"Трансформаторлук подстанциялардын жабдууларынын бузулгандыгынан улам кичи райондордогу айрым көп кабаттуу үйлөр электр энергиясыз калды. Калыбына келтирүү үчүн 34 бригада иштеп жатат. Бирок биздин бригадалардын иштөөсүнө тоскоолдуктар жаралгандыктан калыбына келтирүү иши создуктурулуп жатат. Анткени электр энергиясын бөлүштүрүп берүүчү жабдыктардын ачкычтары үй комитеттери тарабынан табылбай калган учурлар болуп жатат. Ошондуктан биздин бригада бир барган жерине кайра кайрылып баруусуна туура келүүдө. Андан сырткары жер алдынан өткөн электр чубалгыларынын үстүнө жашоочулар унааларын коюп алган жана жеңил курулуштарды куруп алгандыктан биздин бригадалардын иштөөсү үзгүлтүккө учурап жатат", - деп билдиришти "Түндүкэлектр" ишканасынан.

Ишкананын маалыматына караганда, акыркы эки сутка ичинде Бишкектин тургундарынын электр энергиясын пайдалануусу 8-10 пайызга жогорулады. 2017-жылдын ушул күндөрүнө салыштырмалуу 20-25 пайызга көп.